Il Consei comunâl dai zovins di Maian al va indenant

Se no vês plui voie di fâlu voaltris, lu fasarìn nô. E je cheste, in pocjis peraulis, la decision cjapade cence pierdi timp de sindiche di Maian, Elisa De Sabbata, daspò che i docents referents dal Consei comunâl des fantatis e dai fantats (Ccrr, ven a stâi ‘Consiglio comunale delle ragazze e dei ragazzi’) a vevin visât che no i saressin plui stâts daûr parcè che par lôr “si tratave di une esperience superade”.
La iniziative e lave indenant di 13 agns in graciis de colaborazion tra l’Istitût comprensîf e il municipi e cussì la sindiche De Sabbata no plate il so displasê par cheste decision: “O vin ricevût un messaç di pueste eletroniche ai 8 di Setembar indulà che i docents nus visavin de sielte di no lâ plui indenant cun chest progjet che al jere stât pensât de aministrazion comunâl in acuardi cu la scuele tal 2012”.
E cuant che e je stade la prime zornade di scuele a une frute a àn fat lei un comunicât indulà che si visave che nol sarès plui stât fat il Consei comunâl dai fantats, ancjemò prime – a fasin savê dal municipi – che e fos fate une riunion tra Zonte comunâl, docents e dirigjent scolastic, indulà che nol è stât spleât il parcè di cheste sielte.
A chest pont il Comun al larà indenant cence i docents cu la modifiche dal regolament dal Consei dai fantats fate dilunc de sentade dal Consei comunâl martars ai 30 di Setembar: “La composizion dal Ccrr – e sotlinee De Sabbata – e sarà chê di prime e lis elezions a saran fatis dut câs a scuele, ma il funzionament al sarà diferent. Il Ccrr al deventarà une ativitât extra curicolâr e i fantats elets si cjataran almancul trê voltis par an inte sale consiliâr dal municipi e lis sentadis a saran publichis. Il gnûf Consei dai fantats al varà funzions propositivis e consultivis pal Comun e al podarà proponi iniziativis a pro dai zovins”.
A stâ daûr al gnûf Ccrr e sarà la assessore cun deleghe aes Politichis pai zovins Giulia Benedetti, che la sindiche le ringracie pe disponibilitât a lâ indenant, e la Consulte dai zovins di Maian. (a.d.g.) – 24.10.2025