La edizion 2023 dal Calendari Storic dai Carabinîrs e “fevele”, pe prime volte, in lenghe furlane: e je la enesime testemoneance dal leam profont de Arme cul teritori furlan.
La iniziative, nassude de colaborazion tra il Comant de Legjon dai Carabinîrs “Friuli Venezia Giulia”, la Regjon Autonome Friûl-Vignesie Julie e la Agjenzie regjonâl pe lenghe furlane, e je stade presentade vuê di matine, ai 19 di Dicembar dal 2022, te sede de legjon, in viâl Vignesie 189, a Udin, denant dal gjenerâl Francesco Atzeni, comandant de Legjon dai Carabinîrs dal Friûl-Vignesie Julie, Pierpaolo Roberti, assessôr regjonâl aes Autonomiis locâls, Piero Mauro Zanin, president dal Consei Regjonâl dal Friûl-Vignesie Julie, Pietro Fontanini, sindic dal Comun di Udin, la senatore Francesca Tubetti, Fabrizio Tomada, conseîr dal Fogolâr Furlan di Rome e Eros Cisilino, president de Agjenzie regjonâl pe lenghe furlane. Pe ocasion a jerin presintis cetantis autoritâts.
“E je une zornade storiche pe Legjon dai Carabinîrs dal Friûl-Vignesie Julie – al à declarât il Gjenerâl Atzeni – e un moment straordenari di colaborazion produtive cu lis istituzions regjonâls parcè che o presentìn un dai simbui plui “iconics” de Arme, che an par an al è stât bon di puartâ un messaç impuartant a ducj chei che lu àn ricevût o che i àn dât ancje dome une passade. O sin la Arme Benemerite de int, e il lunari in lenghe furlane al è la testemoneance concrete dal leam fuart che i carabinîrs a àn cul teritori e cu la coletivitât che a servissin. Chest an o proponìn il teme une vore delicât de tutele ambientâl, che si cjate ancje intai articui 9 e 41 de Costituzion, e che par nô Carabinîrs al è simpri stât une vore impuartant, ancjemò di plui dal 2017, cuant che – cu la acuisizion des competencis e des risorsis dal Cuarp Forestâl dal Stât -, la Arme e je deventade la plui grande fuarce di polizie ambientâl di Europe”.
“Jessi presint chi, vuê, al à par me un valôr particolâr – al à sclarît l’assessôr Roberti -, parcè che chest nol è dome un calendari, ma tant di plui. Cemût che al à dit il gjenerâl Atzeni, al è alc di iconic, al è culture, al è identitât. Duncje, doprâ il furlan ancje pal Calendari Storic dai Carabinîrs al è un mût par dâi dignitât a une lenghe che le à ad implen, o ben chê furlane. Al è fâ capî che e je la massime uficialitât: chê dal Stât e di une sô componente fondamentâl tant che la Arme. Lu savìn: chest al è un calendari speciâl, si lu picje in tantis sedis istituzionâls, e no dome, e di vuê al fevele par furlan. Par nô e je une ocasion impuartante e mi auguri che a puedin jessi simpri plui iniziativis di chest gjenar e che il Stât al feveli simpri di plui par furlan, inte convinzion che la Regjon e sarà simpri a disposizion par colaborâ par che lis nestris istituzions a doprin ancje la lenghe dal teritori, cemût che e je daûr a fâ la Arme dai Carabinîrs, cun grande previdence”.
“La publicazion dal calendari storic dai Carabinîrs in lenghe furlane e je la sintesi, la convergjence di un interès che sedi lis lenghis minoritariis che il Paîs a àn capît: la vere ricjece di un Stât e je intes sôs diferencis, parcè che al è propit in cheste carateristiche che si cjate la esaltazion de unitât, e no inte omologazion. La Arme e rapresente la unitât de Italie – al à concludût Zanin – in graciis de sô presince capilâr intai paîs, e e je un as puartant de nestre Patrie. Il fat che i Carabinîrs a vedin decidût di voltâ il calendari ancje par furlan al è une testemoneance de integrazion fuarte tra i valôrs esprimûts dai militârs e chei dal popul furlan, o ben indurance, impegn, lavôr, responsabilitât, atenzion”. “Il Calendari de Arme dai Carabinîrs al è cognossût, ancje a nivel internazionâl, tant che une vere icone, pe sô bielece grafiche ricercjade fintremai al spessôr alt dai contignûts. Al è pe ARLeF – al à marcât il president Cisilino – un grant onôr chel di vê rivât a fâ in mût che cheste publicazion e sedi ancjemò plui leade cul teritori e preseade dal popul furlan. La Benemerite e à celebrât che nol è tant l’inovâl dai 72 agns de costituzion de Legjon furlane e la propueste di realizâ adun il Calendari e conferme un pat tra il teritori e la legalitât che al è inte nature stesse dal Friûl, cjatant une armonie plene e naturâl tra i Carabinîrs e i citadins”. (A.D.G.) – 19.12.2022
