I students a vore intal festival dai savôrs di Tumieç

La tradizion de Cjargne e passe la bale ai zovins. A saran plui o mancul une cincuantine i students dal istitût “Paschini-Linussio” di Tumieç che a daran il lôr contribût pal decim an de manifestazion “Il filo dei sapori” previodude dai 26 ai 29 di Otubar. Une sielte, chê di cjapâ dentri lis gnovis gjenerazions, che pe manifestazion e rapresente la pussibilitât di stiçâ i fantats a puartâ indenant culturis e tradizions che di simpri a caraterizin il teritori di mont. I students, di etât dai 16 ai 19 agns, a vegnin di diviersis specializazions: studi enogastronomic, tecnic-economic e linguistic. La rassegne, che l’an passât e à tocjât il record di 80 mil presincis, e promet di jessi ancjemò une volte pardabon un percors ae scuvierte des ricjecis dal teritori di mont dal Friûl-Vignesie Julie. (A.I.) – 24.10.2023