Novitât impuartante pai pazients oncologjics de nestre regjon. E à tacât a lavorâ, tal repart de Radiologjie oncologjiche dal Cro (Centri di riferiment oncologjic) di Davian, la gnove risonance magnetiche di 1,5 Tesla, comprade in graciis di un finanziament regjonâl di plui o mancul 1,4 milions di euros. Si trate di un machinari di ultime gjenerazion, ancjemò plui precîs e bon di dâ oportunitâts gnovis e miôr di cure dai malâts.
La risonance – che e à cjapât il puest di chê che e jere prime in vore e si met al flanc de seconde risonance di 3 Tesla – e garantìs une risoluzion alte e precision diagnostiche, dant cussì une cualitât ecelente des imagjinis par dutis lis parts dal cuarp (neurologjic, muscul-scheletric e oncologjic). Par di plui, la integrazion cu la Inteligjence artificiâl e permet di ridusi i timps di acuisizion. Il diametri plui grant e il tunel plui curt a dan plui spazi e a ridusin une vore il sens di ansie e di opression dai pazients. Par finî, in graciis dal isolament acustic, il nivel dal rumôr dulinvie dal esam al è cetant plui ridusût.
I lavôrs di adeguament dai locâi e la metude in vore dal machinari a son stâts completâts in siet mês, su la fonde dal program. E je stade dade tante atenzion ancje al ambient indulà che si cjate il machinari, plui a misure di om, cu la instalazion di panei iluminâts par daûr, cun fonts studiâts a pueste par rindi plui plasevule la permanence dentri de stanzie intant dal esam. (a.d.g.) – 06.08.2026
