Il campus universitari dai Riçs al cres cu la realizazion de gnove biblioteche dal pôl sientific, che e darà acet ancje a une sale polifunzionâl inovative cun tribune telescopiche, buine di trasformâsi in auditorium o sale studi daûr des esigjencis. La biblioteche e je stade screade dal retôr Roberto Pinton, dal sindic dal Comun di Udin Pietro Fontanini e dal assessôr regjonâl ae Universitât Alessia Rosolen.
“Nassût par ospitâ la biblioteche – al à dit Pinton –, al è deventât un edifici polifunzionâl – forsit o fasarìn chi ancje la scree dal an academic -, cun nivei alts di acessibilitât e di sostignibilitât viodût che al è un dai pôcs edificis publics di chestis dimensions a vê la certificazion Casa Clima. E je stade une idee condividude e scomençade dai retôrs di prin e cul lavôr di une grande scuadre di tecnics e esperts”.(ADG) – 23.11.2022
