Un cîl stelât cuntun messaç di pâs e sot la lobie cu la sante famee, plui injù lis pioris e ancje i camêi e, tornant sù pai cuei, un grant biel arbul: chel de buinegracie. I frutins de scuelute “Michieli” di Flumisel a àn fat un presepi cul jutori des mestris, dai gjenitôrs e dai nonos, ma ancje di cualchi aziende di chenti che ur à regalât i materiâi.
Une comunitât unide che e à cussì vinçût il premi decidût dai letôrs di chest gjornâl vie pal Concors inmaneât dal Unpli regjonâl e che al à coinvolzût passe setante scuelis.
Il bon, par comprâ materiâl didatic e ce che al covente, al è stât dât vie par une piçule cerimonie dal diretôr Rossano Cattivello, ae presince ancje dal president regjonâl des Pro Loco, Pietro De Marchi, de conseire de Pro Loco di Vile Debora Cidin e dal sindic Alessandro Dijust. A cjapâ il premi il dirigjent Stefano Zulini adun cu lis mestris e il personâl de scuelute, coordenâts di Chiara Odoni. I frutins – a son setante in cheste scuelute – a àn vût a grât e cussì a àn fat ancje une cjantade, simpri leade ae buinegracie, un valôr impuartant come un modon par deventâ grancj te maniere miôr.
“Voaltris – al à dit il diretôr Cattivello – o sês come chescj arbui dal vuestri presepi: o vês di slargjâ lis ramacis cun cetantis fueis, ma par fâlu o vês di vê lidrîs fuartis, se no al baste un colp di aiar par butâus jù”. (r.c.) – 31.01.2025