A son stâts ricevûts cuntun batiman, bocjis ridintis e tante voie di normalitât i students Alessandra e Francesco, tornâts di Dubai tal liceu Magrini di Glemone. I doi students a fasevin part dal grup di dusinte students talians che si cjatavin tai Emirâts araps te suaze dal progjet des Nazions Unidis “Wsc Ambasciatori per il futuro”. Daspò jessi restats blocats par vie dal atac scjadenât di Israêl e Stâts Unîts cuintri dal Iran, a vevin passadis lis gnots dentri des cantinis dal hotel indulà che e durmivin. Îr i doi students, che a son iscrits ae cuarte classe dal liceu sientific, a son rivâts a Malpensa e vuê si son presentâts a scuele.
“Alessandra e Francesco – al à contât il dirigjent Marco Tommasi – nus àn fate une sorprese grande rivant a scuele par saludâ docents e compagns. A jerin emozionâts, ma i compagns ju an acetâts cun felicitât e lôr a jerin contents di ve tornât a cjatâ la normalitât”. (a.d.g.) – 05.03.2026
