La Fondazione Valentino Pontello di Pers di Maian, centri residenziâl ae avanvuardie pe assistence e l’acet di personis cun disabilitât psichiche e fisiche, domenie ai 26 di Mai tacant des 10 di matine, e scree il gnûf zardin sensoriâl “Le stanze a cielo aperto” fat daûr dal Centri di acet, cul jutori de Regjon Friûl-Vignesie Julie, par puartâ benstâ psichic e fisic ai ospits de struture.
In chest spazi vert che al insiore il teritori, e indulà che a àn lavorât intai ultins mês ancje i ospits par meti jù plantis e rosis di cetantis sortis, i cinc sens a vegnin stimolâts dai elements naturâi dentri di ognidune des cinc stanziis midiant de esplorazion e de manipolazion, sburtant a pro di compuartaments positîfs e inclusîfs.
E sarà ancje una grande fieste indulà che si vierzin lis puartis ae comunitât in non de solidarietât e de inclusion.
L’apontament al darà ancje la ocasion par fâ cognossi il lavôr che si fâs ogni dì e par presentâ i ultins progjets de struture che e da acet a 30 personis cun disabilitât che a rivin di dut il teritori. (a.d.g.) – 23.05.2024
