A son daûr a cjatâ ducj un banc, i fantats ucrains scjampâts de vuere e che a àn bisugn di continuâ almancul une ombre di vite normâl, par une riprese che e passe ancje dal frecuentâ la scuele, fantats de lôr etât, insegnants, e imparâ il talian, gnûfs zûcs e gnovis esperiencis pe lôr inclusion.
De direzion gjenerâl dal Ufici scolastic dal Friûl Vignesie Julie (Usr Fvj) clamade in audizion de VI Comission consiliâr e je vignût sù un quado che al confuarte, pai 790 mancul ucrains validâts (727 intes scuelis statâls, 63 in chês paritariis), o sedi che a stan regolarmentri frecuentant une classe inte nestre regjon. Ma no son problemis nancje par chei che a scuegnin ancjemò terminâ l’iter di iscrizion (46 lâts dentri intes statâls e 14 intes paritariis).
Se o vuardìn aes 4 ex provinciis, i numars a fevelin di 25 scuelis statâls gurizanis cun 93 arlêfs lâts dentri e validâts, 10 scuelis paritariis cun 9 lâts dentri e validâts; 40 scuelis statâls pordenonesis cun 165 lâts dentri e 154 validâts, 61 scuelis paritariis cun 13 lâts dentri e 3 validâts; 35 scuelis statâls triestinis cun 134 lâts dentri e 124 validâts, 49 scuelis paritariis cun 7 lâts dentri e validâts; 67 scuelis udinesis statâls cun 381 lâts dentri e 356 validâts, 98 paritariis cun 48 lâts dentri e 44 validâts.
