Dopo plui di 12 mil miis passâts e 46 dîs di navigazion dal puart di Lyttelton in Gnove Zelande, il rompiglace “Laura Bassi” al è rivât tal puart di Triest, completant la mission che lu à puartât a navigâ par plui di doi mês tal Antartic. La nâf e à concludût lis propriis ativitâts di ricercje inte suaze de campagne di spedizion sientifiche in Antartide. Dilunc di cheste mission, e à completât dôs rotazions de Gnove Zelande tal Antartic, circumnavigant il Mâr di Ross e rivant fint te Base taliane in Antartide “Mario Zucchelli” par ativitâts di logjistiche e di supuart. La nâf e je partide po dopo de Gnove Zelande cuntune rote traviers l’Ocean Pacific, dopleant Cap Horn e passant l’Ocean Atlantic a pro di aiar. Dopo une tape a Milazzo e une a Ancone, cumò e je rivade a Triest. La nâf e à ripuartât in Italie i campions di glace dal progjet european coordenât dal Istitût di Siencis Polârs dal CNR. (A.I.) – 22.04.2025
Foto PNRA
