I nestris doi setemanâi – La Vôs dai Furlans e Il Friuli – dai 17 di Març indenant a proponin la bandiere furlane intes ediculis di dute la regjon. Cun cualchi franc in plui, o podês puartâ a cjase il simbul dal nestri popul. A son agnorums che o fasìn cheste iniziative, dongje de Fieste de Patrie dal Friûl, ai 3 di Avrîl, che si fâs di 46 agns in ca (promovude di une leç regjonâl) e che e festeze la fondazion dal Stât patriarcjâl tal 1077.
Lis cerimoniis uficiâls si tegnin chest an a Caprive, ma lis bandieris dal Friûl a varessin di jessi picjadis simpri e par dut, ancje tal forest, cemût che a dimostrin tancj di nô (soredut zovins) che, lant ator par studi e lavôr o ancje dome par plasê, si fasin une foto propite cul nestri simbul. E cussì, no stait a pierdi cheste ocasion, domandait ae vuestre edicule di tignîus in bande une o plui bandieris! (A.D.G.) – 16.03.2023
