Il Comun di Cjampfuarmit e la Societât Filologjiche Furlane, cu la poie de ARLeF, a organizin un cors pratic di lenghe furlane. Il cors si disviluparà in 13 incuintris setemanâi ognidun di dôs oris (par un totâl di 26 oris) ogni miercus, des 8 aes 10 di sere, tacant dai 5 di Otubar dal 2022. Lis ativitâts dal cors, tignût de insegnant Annalisa Galati, a saran gramatiche e grafie de lenghe furlane e aprofondiments storics e culturâi e si tignaran inte sede de Pro Loco di Cjampfuarmit. Il cors al è viert a ducj e no je domandade la cognossince dal furlan o titui di studi particolârs.
Parcè fevelâ tant di furlanetât, di identitât locâl, di lenghe dal Friûl, di culture de nestre tiere? “Se intun zardin e mûr une rose, chel zardin al sarà plui puar” al sclarìs il vicesindic di Cjampfuarmit, cun deleghe ae Culture Christian Romanini che al continue “parcè che propit intune epoche là che il pericul si clame globalizazion (e o zontarès ancje omologazion), al devente fondamentâl valorizâ la diversitât linguistiche e culturâl dal Friûl, no par dîsi che ‘ o sin plui biei, plui brâfs…’ ma cun semplicitât parcè che o sin diviers, erêts di une storie impuartante che e fonde lis lidrîs in Aquilee”. (ADG) – 30.09.2022
