Ae Brigade alpine Julia e je stade dade la citadinance onorarie dal Comun di Taipane. La cerimonie pe consegne de citadinance e je stade fate joibe ai 23 di Otubar, indulà che la Brigade, rivade cui alpins dal 14^ repart Comant e supuarts tatics e de sô Fanfare, e jere rapresentade dal colonel Ruggero Facchini, cjâf di Stât maiôr, tacant de frazion di Prossenic indulà che e je stade titulade ae Julia la strade plui impuartant de frazion. La seconde tape e je stade tal municipi, indulà che il sindic Alan Cescutti al à consegnât la citadinance onorarie par dopo consegnâ la bandiere taliane ae scuele di infanzie primarie “Armando Diaz”. La conclusion de cerimonie inte place plui impuartante cu la deposizion di une corone al monument ai muarts in vuere di Taipane.
Il Consei comunâl di Taipane al veve decidût di conferî la citadinance onorarie ae Brigade alpine Julia come ricognossiment dal so contribût impuartant ae comunitât locâl e tignût cont dal fat de presince costante de Fanfare de Julia sul teritori comunâl e dal sessantesim aniversari de inaugurazion dal Monument ai muarts in vuere fate tal 1055 e volût dal gjenerâl Lino Scuor par onorâ i siei paisans.
Pe Julia si trate de diesime citadinance onorarie daspò di chês di Udin tal 1995, di Tumieç tal 1996, di Paulêt tal 2005, di Tresesin tal 2009, di Arzignano in Venit tal 2012, di Glemone tal 2016, di Cividât, Ruvigne e Triest tal 2024. (a.d.g.) – 24.10.2025
