Buri, un premi mondial pal impegn tal vert

Il comun di Buri al à cjapât il premi internazionâl “Tree City of the World 2025”, Citât dai arbui dal mont dât de Fondazion Arbor Day e de FAO aes citâts che a spichin pe lôr gjestion sostignibile, struturade e continue dal patrimoni urban dai arbui. Alberitalia, il pont di contat nazionâl dal program, al à mandât al Comun di Buri il certificât uficiâl. Un ricognossiment che al met il paîs dongje des altris citâts talianis selezionadis tal 2025, Bergamo, Campobasso, Ferrara, Matera, Jesi, e chês che a àn cjapât il premi di tant timp: Padue, Modena e Turin. Un sucès che al mostre l’impegn de aministrazion comunâl a mantignî e curâ il vert urban, a planificâ zonis plenis di arbui e a promovi une vision ambientâl moderne e responsabile. Si che duncje, Buri al jentre intune rêt internazionâl che e supuarte lis citâts virtuosis e lis vuide suntune strade di miorament continui. “Il ricognossiment – al sclarìs il sindic Eliano Bassi – nol è un sucès formâl, ma soredut un impegn che nus sburte a continuâ a protezi e a miorâ il vert urban pe salût, il benstâ e la cualitât de vite dai citadins”. (A.I.) – 01.04.2026