Ai 13 di Setembar dal 1223, jenfri des muris dal Cjistiel e de Vile di Udin (ven a stâi jenfri des muris dal cjistiel e dal fossalat), il patriarcje di Aquilee Bertolt di Andechs al implantà il marcjât che al varès dât vite al prin nucli urban de citât di Udin: capitâl dal Friûl storic. Passâts 802 agns di chel at fondatîf, cheste ricorence e ven memoreade e celebrade in graciis de iniziative dal Circul Universitari Furlan “Academie dal Friûl” e dal Moviment Civic Culturâl Alpin-Adriatic “Fogolâr Civic” vuidâts dal prof. Alberto Travain, cu la poie de ARLeF – Agjenzie regjonâl pe lenghe furlane. In ocasion dal “complean”, ai 13 di Setembar cu ven, il Circul al dediche in maniere ideâl ai furlans – e no dome – un piçul riclam a chest inovâl ancje in gracie de distribuzion di depliants sul teme, metûts adun de Agjenzie cu la colaborazion dal Fogolâr Civic, e che a saran a disposizion in ocasion des celebrazions in program.
Chê dai 13 di Setembar no je dome une date storiche che puartà ae nassite di Udin tant che citât-marcjât, cuntun guvier autonom e cuntun rûl centrâl tal Friûl patriarcjâl, «ma un moment clâf pe identitât di dut un popul e di un spazi di civiltât ae crosere de Europe», al à ricuardât il president de ARLeF, Eros Cisilino. Udin al fo il Comun citadin plui potent e inventîf intune Patrie dal Friûl feudâl, frontiere malcuiete di civiltâts, formis di guvier e istancis sociâls. Une vicende apassionante che dal sigûr in chei 13 di Setembar e à vût une volte significative, sigurant ai furlans, tal ben e tal mâl, un riferiment gnûf e ancje disinvolt dentri de lôr storie, ancje cun stagjons promiedis di democrazie e partecipazion che a fevelin ancje al dì di vuê.
Dal 2001 indenant, il “Complean de Citât” al è celebrât ogni an tant che manifestazion popolâr spontanie. La celebrazion dal “Complean de Citât” e je un rituâl laic e popolâr che e torne a meti in lûs ancje simbui evocatîfs come la “scraçule” par clamâ dongje i citadins e il cûr cun imprimude la steme de citât. E je une ricorince che e cjate lis sôs lidrîs tal popul furlan. Di fat la iniziative e je partide di une piçule clape di citadins apassionâts che a àn rivât a clamâ dongje man man dute la comunitât udinese, metint adun un calendari di apontaments che ancje chest an a saran proponûts propit ai 13 di Setembar, scomençant des 9.30 di buinore, cun partence de place XX di Setembar. Tal 2005, cun di plui, il Comun al à alçât pe prime volte la bandiere civiche sul Cjistiel in ocasion de ricorince, une presince aromai permanente. «Tornìn ae lidrîs, alore, e a chel sium che al è dentri ogni scomençâ. Co e nas une citât, ve che une gnove sperance di umanitât si impie te Storie. Siums e progjets antîcs afidâts a popul e istituzions», al à ricuardât il professôr Alberto Travain, fevelant de iniziative. (A.I.) – 12.09.2025
