Armonie: un an di events e di progjets a Coder

Par celebrâ i trente agns di ativitât che a saran ai 25 di Setembar, la associazion musicâl e culturâl “Armonie” di Coder di Sedean, fondade tal 1996, e à metût adun une stagjon che e dure dodis mês, fate di dodis concierts in sîs comuns diferents. Di trente agns dongje de comunitât cu la idee di une culture buine par ducj e acessibile a ducj, tirant sù une schirie di progjets origjinâi e compagnant passe 1400 zovins tal studi de musiche, la associazion dal president Mattia Mestroni e dal diretôr artistic Fabrizio Fontanot e à inmaneât un cartelon di events che a son un percors, une grande conte corâl, “une stagjon che no si scolte, no si viôt, ma si vîf”, fate di musiche, laboratoris e testemoneancis. Prime dai concierts, Armonie e à tacât un progjet cetant impuartant pal a vignì de associazion: l’inmodernament de sede pai 300 associâts. Stant che i fonts de Regjon e chei dal Comun di Sedean a son za stâts doprâts par une part dai intervents, Armonie e à mandât fûr une iniziative di “crowdfunding”; ven a stâi la racuelte in rêt (su: www.ideaginger.it fint ai 17 di Zenâr) dai bêçs che a conventin par meti lis gnovis tecnologjiis dentri de scuele: plui o mancul, 7 mil euros
(A.I.) – 13.01.2026