In chestis setemanis e je tacade la consegne, a passe 600 classis de scuele de infanzie, di materiâl didatic e informatîf de bande de ARLeF – Agjenzie regjonâl pe lenghe furlane. E je une operazion che e ven daûr di chê fate l’an passât, cuant che a son stâts dâts fûr i posters educatîfs di Anìn e che si zonte aes ativitâts che la Agjenzie e promôf intal setôr scolastic. In chest câs specific, la distribuzion, sore nuie, e à cjapât dentri 233 scuelis de infanzie dal teritori di lenghe furlane, ven a stâi 174 istitûts comprensîfs e 59 scuelis paritariis.
Sedi ai piçui arlêfs che ai insegnants a son stâts furnîts materiâi che a podaran supuartâ la ativitât di insegnament dal furlan. Dai albums par colorâ ai audiolibris cun filastrocjis par furlan, dai dvd ai posters; cun di plui ancje tantis schedis didatichis coloradis pensadis propit pai plui piçui, che a judaran i insegnants tal stimolâ frutis e fruts in maniere dinamiche e divertente. La distribuzion si è sielt di fâle ae fin dal cicli scolastic par permeti di tornâ a tacâ tal mês di Setembar cuntune grande selezion di materiâi za a disposizion dai docents.
Il president de ARLeF, Eros Cisilino, al à consegnât i materiâi di persone e in maniere simboliche al ples de scuele de infanzie di Terençan, par marcâ la firme dal protocol di intese pe tutele e pe promozion de lenghe furlane, fat che al è pôc cul Comun di Puçui. A àn partecipât al incuintri la dirigjente scolastiche dal Istitût Comprensîf di Puçui, Elena Venturini e la docente referente pe lenghe furlane dal Istitût, Annalisa Galati.
Cheste gnove distribuzion e rapresente la implementazion naturâl di un progjet plui grant che, de fin dal 2022 incà, al à impegnât la ARLeF te distribuzion sore nuie, in ocasion di ogni an scolastic, dal Manuâl pal insegnament de lenghe furlane “Anìn!” intes scuelis primariis. Chest, di fat, al è il prin manuâl pensât par compagnâ i arlêfs a scuvierzi il furlan, lis particolaritâts dal teritori dal Friûl, la sô storie e la sô culture. Il progjet al è promovût de ARLeF par meti in vore il Plan gjenerâl di politiche linguistiche pe lenghe furlane 2021-2025 de Regjon Autonome Friûl-Vignesie Julie. Il volum al è dât fûr a gratis a ducj i arlêfs de scuele primarie che i lôr gjenitôrs a àn aderît al insegnament de lenghe furlane tant che previodût de leç 482/99 e de leç regjonâl 29/2007.
Par ogni informazion, i docents a puedin contatâ il Sportel Regjonâl pe Lenghe Furlane clamant il 0432.1743400, o scrivint ae direzion email scuele@sportelfurlan.eu. (a.d.g.) – 04.06.2025
