Il president de Agjenzie Regjonâl pe Lenghe Furlane, Eros Cisilino, al à regalât ai arlêfs des scuelis mediis di Codroip un librut in furlan e talian dedicât ae storie dal curiôs cimeli rinassimentâl scuviert dal professôr Travain e leât ai ultins tentatîfs di restaurâ la signorie patriarcjâl in Friûl: “E je la vuestre storie, la memorie che si fâs scuse par unîus tal vuê: lait a cirîle, a sgarfâle fûr tai particolârs di ogni vuestri borc!”.
L’opuscul al è dedicât e preziose acuile rinassimentâl di Aquilee, opare dal Pilacorte e datade 1525, che e je stade scuvierte, ven a stai decodificade dal professôr Alberto Travain in graciis dal solecit di dôs sôs arlevis di Guriciz, frazion di Codroip che par trê secui e jere stade tes mans dai Asburgo, che di chest i siei residents a son clamâts “imperiâi”. (a.d.g.) – 10.11.2025
