La Universitât dal Friûl e à fissât la date des elezions pal gnûf retôr, il decim inte storie dal Ateneu, che al varà di cjapâ il puest di Roberto Pinton che al restarà ae vuide fintremai ai 30 di Setembar.
Il gnûf retôr al tacarà a lavorâ il prin di Otubar e al vuidarà la universitât furlane par sîs agns. Lis votazions, che a saran eletronichis, a saran fatis in cuatri datis: ai 19 di Març, se dal câs ai 2 e ai 9 di Avrîl e, pe balotazion, ai 16 di Avrîl. Par jessi elets in prime convocazion e covente la maiorance assolude.
In seconde e tierce convocazion il quorum si sbasse al 40%. Ae balotazion si larà in câs di mancjade elezion tes primis trê datis e si varà di sielzi tra i doi candidâts che a àn cjapât plui vôts inte tierce votazion.
Lis candidaturis a van presentadis dai 17 di Zenâr ai 12 di Març. (a.d.g.) – 14.01.2025