A Tarvis la arene a forme di piano

La musiche classiche e cjate il paisaç des Alps Juliis, mudant place Unità d’Italia a Tarvis intun elegant teatri tal viert. Dai 4 ai 19 di Lui si davuelç “Arena Musicæ”, il piano protagonist a Tarvis, une gnove schirie di concierts direte di Davide Fregona e promovude te suaze dal Concors Internazionâl “Piano FVG” a Sacîl, che e puartarà tal cûr de citât cualchidun dai artiscj plui emozionants de sene europeane dal piano. I concierts a saran ospitâts tal paveon di sunôrs viazant ideât dal Distret culturâl Musicæ Piano, che al à za zirât in cetancj spazis urbans in dute la regjon dal principi. Fate dal dut di len locâl, la struture e somee a un piano e je stade progjetade par ufrî une esperience di scolte imersive, dulà che la architeture, la musiche e il paisaç a son intun dialic in armonie perfete. Il cartelon di Tarvis al larà indevant par trê fins di setemane un daûr di chel altri. Il pianist venezian Lorenzo Tonon al vierzarà sabide ai 4 e l’ospit di onôr dal festival, il “pianist fûr puest” Paolo Zanarella, al sunarà domenie ai 5. (A.I.) – 03.07.2027