A Manià la fieste dai curtìs e devente une marche

“Coltello in festa” e devente une marche regjistrade. Il non de storiche fieste di Manià che e celebre il mont des lamis in dutis lis manieris, e devente in forme uficiâl il simbul de manifestazion che si fâs ogni fin dal Istât, ma ancje dai valôrs leâts ae art dai faris e dai artesans dai curtis dal paîs. Une ativitât cun passe cinc secui di storie, che e à fat deventâ il paîs innomenât a nivel internazionâl. In ocasion de regjistrazion de marche, la fieste e je za stade anunziade pai 29 e 30 di Avost: un gnûf apontament che al met dongje tradizion, inovazion e divertiment par ducj. Il simbul de fieste al jere stât ideât tal 2020 ma doprât dome che l’an dopo par vie dal Covid: e je une schirie di lamis di colôrs e formis diferentis, stilizadis e presentadis a raiere. La marche no je dome che un at formâl, ma e rapresente la volontât di tutelâ un patrimoni di ducj i abitants di Manià, massime chei impegnâts dal setôr de produzion dai curtis. (A.I.) – 24.02.2026