A Celiberti la citadinance onorarie di Mortean

Il consei comunâl di Mortean al à conferît la citadinance onorarie a Giorgio Celiberti, par esprimi al pitôr e scultôr la stime e l’agrât de Aministrazion e di dute la popolazion. Tra lis motivazions pal ricognossiment: lis altis dotis di artist che lu àn fat preseât in Italie e intal mont, il grant lavôr a pro de difusion de art e il leam profont cu la int de tiere là che al è nassût. Dal passât Fevrâr, Mortean al ospite une mostre dal mestri cun oparis in place e in municipi. In ocasion dal “Giorno della memoria”, dal cjampanili plui alt di Italie a son lâts jù doi draps di 60 metris piturâts dal artist. La cerimonie di consegne de pergamene cu la citadinance onorarie e je in program martars ai 13 aes 6.30 dopomisdì inte sale dal consei comunâl. (A.I.) – 12.09.2022