Par fâ front aes boletis plui cjaris si sbassaràn lis temperaduris in classe

L’inzirlôs aument dai presits de energjie al met a dure prove i istitûts scolastics superiôrs, come che a àn declarât i doi comissaris straordenaris dai Ents di decentrament regjonâl (Edr) di Udin-Pordenon e Triest-Gurize al president e ai conseîrs de VI Comission.
Indispensabil, duncje, cori ai ripârs e ativâ ducj i sparagns pussibii, a scomençâ dal sbassament de temperadure intes classis, cul aiût dai dirigjents scolastics. I presidis, par vôs dai rapresentants des lôr associazions di categorie Anp e Andis sintûts vuê, a son, invezit, setics su la setemane curte obligatorie par ducj i istitûts e a disin no ae reintroduzion de didatiche a distance. (ADG) – 20.09.2022