Corints di culture sul flum Stele

Daspò de Tor, il flum Stele al è l’altri protagonist dal progjet metût adun dal Istitût Ladin Furlan “Pre Checo Placerean” cu la Regjon, la Arlef e i comuns che a àn decidût di spartî un calendari comun fat di incuintris, art e divulgazion culturâl. Dut chest cun dôs produzions origjinâls, che a fasin part dal itinerari dilunc dai comuns: un toc musicâl cuntun video, “Stele me”, e un cine, un curtmetraç. “Correnti di Cultura”, corints di culture, e je une rassegne che e vûl contâ il teritori intune maniere diferente, tirant dentri un public di gjenerazions diferentis. Il flum di risultive de Basse furlane al devente si che duncje un simbul di memorie, continuitât e apartignince, che cumò al à ancje une “colone sonore”: la cjançon par furlan scrite, cjantade e sunade di Alessandro Pozzetto e Nico Odorico. Dongje di chê, la storie di un viaç simbolic di un frut dilunc di chel flum, zirade dal regjist Simone Vrech. Il centri di un progjet che al met adun ambient, culture e comunitât cu lis memoriis dal teritori, des personis e  dai mudaments. Daspò di un laboratori pai students di Pucinie, ai 28 di Mai si torne a tacâ a Palaçûl cuntune conference di Gianluca Doremi, intant che tai mês di Jugn e di Lui a rivaran i concierts a Rivignan e Talmassons e altris cunvignis. . (A.I.) – 27.05.2026