Taramot: la rispueste dai emigrâts in Belgjiche

Ricuardâ lis vitimis dal taramot dal 1976, fâ un omaç ae fuarce e ae capacitât dal Friûl di tornâ a partî dopo la tragjedie, ma ancje esprimi la ricognossince de comunitât regjonâl ai tancj emigrants che de Italie e dal forest a àn contribuît ai sfuarçs di supuart e ae ricostruzion. Chest al è il significât dal viaç comemoratîf promovût de organizazion “Friuli nel Mondo” e de Regjon F-Vj in ocasion dal cincuantesim aniversari dal taramot, che al è rivât cumò a Bruxelles cu la mostre fotografiche “Terremoto Friuli 1976-2026”. La capitâl belgjiche e je une fermade impuartante par chest viaç di ricuarts, inmaneât cul supuart dai Fogolârs dopo dai events a Bergamo, Lion, Mulhouse e Basilea e che si sierarà a Rome. La mostre a Bruxelles e ricuarde un cjapitul impuartant de storie da solidarietât europeane, leât a Domenico Lenarduzzi, fi di emigrants furlans, un funzionario da Comission europeane, il “pari” dal program” Erasmus” e il fondadôr dal Fogôlar Furlan de Belgjiche. Daspò dal taramot, Lenarduzzi si jere mobilitât par tirâ sù medisinis e dut ce che al servive daurman aes popolazions colpidis, judant a organizâ une rêt di supuart che e cjapave dentri lis istituzions europeanis, il personâl de UE e lis comunitâts furlanis in Belgjiche. Cheste esperience e je emblematiche di dut chel che a àn fat i furlans che si cjatavin tal forest par tirâ su une rispueste di solidarietât. (A.I.) – 14.10.2026